அது ஒரு காதல் காலம் பகுதி 3

"ரகு, அங்க பாரு, வந்துட்டாடா"

அன்னிக்கு வெளிர் மஞ்ச கலர் சுடிதார். ஒரே நொடி, பட்னு கடந்து போய்ட்டா. ஆனா அந்த நொடி, இன்னிக்கும் ஞாபகம் இருக்கு. எதையோ நெனச்சு மனசுக்குள்ள சிரிச்சிட்டு இருந்திருப்பா போல, புன்னகை ததும்பும் முகம். (ஒரு வேளை என்ன பத்தியா இருக்குமோ?). எங்கள கடந்து போகும் போது பாத்தா மாதிரி இருந்துச்சே! பாத்திருப்பாளோ? .

 "என்னடா இன்னைக்கு வேற வண்டில வந்திருக்கா!"

அப்போ தான் அத கவனிச்சேன். சாமி சிலை பவனி வரும் போது எந்த தேர்ல வருதுன்னு யாராச்சும் பாப்பாங்களா? அத மொதல்ல பாக்கவே இல்ல நான். அன்னிக்கு ஸ்கூட்டில வந்தா.

"ராகுல், டேய் ராகுல்"

சாமி தரிசனம் பண்ணிட்டு இருக்கும் போது யாருடா அது நந்தி மாறி,"என்னடா"

"ராகுல், அந்த வண்டிய வேற யாரோ ஓட்டிட்டு வராங்க பாருடா!"

"அவங்க அப்பா மாறி இருக்கு. என்னடா இப்டி நம்மல அடிக்கற மாறி பாக்கறாரு?"

"டேய் எரும மாடு. உனக்கு புடிச்ச பொண்ணு தான். அதுக்குனு இப்டியா வெச்ச கண்ணு வாங்காம பாப்ப?அதான்"

அவர் முகத்த பாக்கணுமே. எள்ளும் கொள்ளும் முகத்தில் வெடித்தது அப்டினு கேள்வி பட்டு இருக்கேன், அன்னிக்கு தான் பாத்தேன். அவ வண்டிய ஓட்டிட்டு வருவா, வெளிய வரும் போது பேசிடலாம் அப்டினு நெனச்சிட்டு இருந்தேனே. இப்டி நம்ம கனவு கோட்டைய கலச்சிட்டாரே.  இன்னும் கொஞ்ச நேரம் அங்க நின்னுட்டு இருந்தோம், அடி வாங்கிடுவோம்னு தெளிவா தெரிஞ்சது. என் வண்டி அன்னிக்கு தான் டாப் ஸ்பீட் போச்சு.

"நண்பா, என்னடா இப்டி சொதப்பிடுச்சு, சரி என்ன ஆபீஸ்ல விட்டுடு. சாயங்காலம் பாத்துக்கலாம், என்ன வந்து 5 மணிக்கு பிக் பண்ணிக்க. சாயங்காலம் கொஞ்சம்  மறஞ்சு நிப்போம். இன்னைக்கு அவ  வீட்டயாச்சும் கண்டுபுடிச்சிடலாம் கவலைபடாத"

காத்திருப்பது அப்டினா என்னனு அன்னிக்கு தான் தெரிஞ்சது. நொடி முள் எது, நிமிட முள் எதுன்னு கொழப்பமா இருந்தது. என்னங்க கொஞ்சம் அதிகமா இருக்கா? அப்டி தான் எனக்கும் தோணுச்சு. ஆனா என்ன பண்ண, கொஞ்சம் கூட நேரம் நகரவே இல்ல. 4 மணிக்கே ரகு ஆபீஸ் போய் நின்னேன். அவன கூட்டிட்டு 5 மணிக்கெல்லாம் அதே எடத்ல ஆஜர். கொஞ்சம் மறஞ்சு நின்னுகிட்டோம். 

"மச்சி ஒரு வேளை அவ வராம அவங்க அப்பா மட்டும் வந்தா என்ன பண்ண?"

"அத நான் யோசிச்சிட்டேன், ரெண்டு ஹெல்மெட் கொண்டு வந்திருக்கேன். ரெண்டு பேரும் போட்டுட்டு அவர் பின்னாடி போய் வீட்ட கண்டுபுடிக்காம வர்றதில்ல"

"அப்போ இன்னிக்கு களி திங்கறது உறுதி" 

" மச்சி அவ தான் ஓட்டிட்டு வரா, பின்னாடி யாருடா?"

"எத்தன கேள்விடா கேப்ப? நானும் உன் கூட தான இருக்கேன். அவ அண்ணன் இல்ல தம்பியா இருக்கும். உனக்கு எதிரிகள் எண்ணிக்கை அதிகமாகிட்டே போகுதுடா" 

வண்டி எடுத்துட்டு வெளிய வர்ற வரைக்கும் வெயிட் பண்ணோம்.அவ கூட வந்த பையன் ஸ்கூட்டிலயும், அவ சர்வீஸ் விட்ட வண்டிலையும் கெளம்பினாங்க. காந்திபுரம் பிரைவேட் பஸ் ஸ்டான்ட் போனாங்க.

"ரகு, என்னடா அவ ஊருக்கு போகறாளா, இல்ல அவன் போறானா. ரெண்டு வண்டில வேற வந்திருக்காங்க. ஒன்னும் புரிலடா"

"இங்கயே நில்லு வந்திடறேன்"

அவங்க நிக்கற பஸ் பக்கதுல போய் யார் கிட்டயோ பேசிட்டு இருந்தான். 

"மச்சி அது மெட்ராஸ் பஸ். அவ கூட வந்தது அவ தம்பி. அவ தான் போறா. அந்த கண்டக்டர் கிட்ட பேசும் போது அவளும் அவ தம்பியும் பேசிட்டு இருந்தத கேட்டேன். அப்பறம் வண்டி பஸ்ல ஏத்தி விட போறாங்கன்னு நெனைக்கறேன். அவ தம்பி பெட்ரோல் மொத்தமா எடுத்திடணும்னு பேசிட்டு இருந்தான்"

"என்னடா சொல்ற? அப்போ அவ போறாளா?"

ஒரே நிமிஷம் தான்.

"ரகு, அந்த பஸ்ல டிக்கெட் இருக்கா கேளேன்"

"தம்பி, நீ என்ன யோசிக்கறனு தெரியுது. இதுவரைக்கும் வந்தது ஓகே. ஆனா நீ  பண்றது டூ மச் டா"

"தெரியுது மச்சி, ஆனா என் உள் மனசு ஏதோ சொல்லுது டா"

"சரி, உனக்கு தெரியாதது இல்ல.என்னமோ பண்ணு. வீட்ல என்ன சொல்ல போற"

"இருக்கவே இருக்கு இன்டெர்வியு. இப்போ தான் கால் பண்ணாங்க. நாளைக்கு இன்டெர்வியு, இப்போவே போகணும்னு சொல்லிடலாம்"

"அடப்பாவி, கிரிமினலா தான் பிளான் பண்ற"

"சரி வா, ATM வரைக்கும் போய்ட்டு, சாப்டுட்டு வரலாம்"

"ATM எதுக்கு டா, உனக்கு தான் அக்கௌன்ட் எங்கயும் இல்லையே"

"உன்கிட்ட இருக்கே, இன்னைக்கு உனக்கு சம்பள நாள் வேற"

"வந்து தொல"

பணம் எடுத்துட்டு வந்த போது, அவ தம்பி வண்டிய பஸ்ல ஏத்திட்டு இருந்தான். இவ கூட நின்னு பாத்துட்டு இருந்தா. கண்டிப்பா போணுமா? நான் யாருன்னே தெரியாதுனு சொல்லிட்டா? கண்டிப்பா அதான் சொல்ல போறா. ரெண்டு மனசு. என்ன முடிவு எடுத்தேன்னு நான் சொல்லித்தான் உங்களுக்கு தெரிய வேண்டியது இல்ல.ரகு டிக்கெட் எடுத்துட்டு வந்து குடுத்தான். 

"மச்சி, எனக்கு ஆம்பள கொழந்த பொறந்தா..."

"இதுக்கு மேல எதாச்சும் சொன்ன, கொன்னுடுவேன் உன்ன, பரதேசி. ஏன்டா 3 மணி நேரம் போற பஸ்லயே போர் அடிக்குது அப்டி இப்டினு சீன் போடுவ, இப்போ அவ்ளோ தூரம் எப்டிடா போவ?"

"மச்சி, கார்த்திக் ஜெஸ்ஸிய தேடி ஆலப்புழா போனாரே. சூர்யா மேக்னாவ தேடி U.S வரைக்கும் போனாரே. போகும் போது அவங்க லவ்வர் பத்தி நெனச்சு பாத்துட்டு தான் போயிருப்பாங்க. அவங்க அவ்ளோ தூரம் நெனச்சு பாத்துட்டே போகும் போது, நான் அவள நேர்ல பாத்துட்டே இந்த 10 மணி நேரம் போக முடியாது?"

"வாய் கிழிய பேசு. இதோட 2500 ரூபா வாங்கிருக்க. கம்னாட்டி வேலை கெடச்சதும் பெரிய பார்ட்டி வெக்கிற. சரி நான் கெளம்பறேன் பாத்து போ"

"இருடா உனக்கு இன்னும் வேலை இருக்கு. சுனில்க்கு கால் பண்ணி கோயம்பேடு வந்து கூட்டிட்டு போக சொல்லிடு. அப்பறம் அவ தம்பி பின்னாடி போய்.."

"சொல்லாத செஞ்சு தொலைகிறேன்"

பஸ்ல அவ சீட்க்கு ரெண்டு சீட் பின்னாடி நான்.பேசலாமானு யோசிச்சேன். சக பயணிகள் என்ன சாகடிசிட்டாங்கனா என்ன பண்ண?காலைல போய் பேசிக்கலாம்னு விட்டுட்டேன். அன்னிக்கு நைட் சிவராத்திரி. 

ஹ்ம்ம, அவள பாத்துட்டே இருந்த அந்த நைட், என்ன என்ன எண்ணம் தோணுச்சுன்னு வார்த்தையால விவரிக்க முடில.காலைல போய் என்ன நடக்கும், என்ன பண்ண போறோம். ஒன்னும் தெரில. என்ன பாத்தா மாறியோ, நான்னு ஒருத்தன் இருக்க மாறியோ அவ காமிச்சிக்கவே இல்ல. அன்னிக்கு பொழுது ஒரே கொழப்பதோட விடிஞ்சது.

மெட்ராஸ் வந்துச்சு. கூடவே என் வாழ்கைல வசந்தமும்.